Nafarroaren Historia. Memoria bizia (1512-1982)

GERTAKARI ETA ABAGUNE NABARMENEN INGURUKO 12 HITZALDI, NAFARROAREN KONKISTATIK ESPAINIAKO TRANTSIZIORA BITARTE

Euskokultur Fundazioak eta Udako Euskal Unibertsitateak elkarlanean antolatuta, 1512. urtetik XX. mende hondarrera arteko ibilbidea aztertuko dute 12 saioko ikastaro batean.

Antolatzaileek hamabi hitzaldi prestatu dituzte, 500 urteko historia gizarteratzeko asmoz: konkistaren ondotik sorturiko testuinguru, bizimodu, pentsamendu eta arrazoibideen segida; Nafarroaren biziraupena, haren nortasuna foruen inguruan zainduta; politikari, intelektual zein herritar xehe aunitzek eginiko ekarpena, koiuntura bakoitzean eta ibilbide osoan zehar. Argilunez beteriko ibilbidea, nolanahi ere.

Saioak Arrotxapea auzoko Euskokultur Mintegian eginen dira, astero-astero, otsailaren 20tik maiatzaren 16ra. Asteazkenetan euskaraz eta ostegunetan gaztelaniaz, biak ala biak 19:30etik 21:00etara. Hurrenez hurren, Amaia Álvarez eta Aitor Pescador historialariak izanen dira bi taldeon gidari.

Izen emateko epea otsailaren 15 arte zabalik da, taldearen arabera matrikulak 50-60 euroko prezioa du eta plazak mugatuak dira. Xehetasun guztiak eta izen emateko argibideak Euskokultur Fundazioaren atarian (www.euskokultur.eus-en) aurkitu ahal dira.

Biko-Teka III. edizioa

Liburu ilustratuak sortzeko ilustrazio eta narraziogintza tailerraren III. Edizioa antolatu dute Galtzagorri Euskal haur eta gazte literatura elkarteak eta Iruñeko Udalak elkarlanean. 2019ko urtarrilaren 29tik otsailaren 2ra burutuko da Iruñeko Descalzos kaleko Igogailu ondoko udal aretoan. Lau egun eta erdiz, guztira, 37 orduko tailer praktikoa eskainiko da.

Irakasleak Harkaitz Cano eta Aitziber Alonso izango dira. Azken egunean, Mikel Soto (Txalapartako editore ohia) eta Paxkal Indo (ZTK-ko editorea) izango dira hizlari.

Idazle eta ilustratzaileek parte hartu dezakete, bakarka zein binaka. Bakarka aurkezten direnei bikotea aurkituko zaie. Gehienez irudigile eta idazle banak osatutako 8 bikote hautatuko dira.

Dokumentazioa aurkezteko azken eguna: 2019ko urtarrilaren 14a da.

Informazio gehiago: www.galtzagorri.eus.

“Kafe bar bilbao” teatro laburreko gidoien XVI. Lehiaketa

TARTEAN teatroak lagunduta, bi sari banatuko ditu: bata euskarazkoa, bestea erdarazkoa. Kafe–teatrorako edo formato txikiko antzerki–lanetarako gidoiak aurkeztuko dira. “Formato txikia”-k zera esan nahi du, lanaren beharrizanak (teknikoak edo artistikoak) txikiak direla eta bere ekoizpena eta banaketa “erraza” izan daitekeela. Lanaren luzera 30 minutuko antzezlan bati dagokiona izango da, gutxi gorabehera.

Sari bakoitza 750 euro (zergak baino lehen) izango da.

Gidoiak emailez bidaliko dira Kafe Bar Bibao-ra: info@bilbao-cafebar.com helbidera, 2018ko abenduaren 31.

CAF-Elhuyar sariak 2018

Zientzia eta teknologiaren arloko gaien eta ikerketen euskarazko gizarteratzea aitortzea eta bultzatzea dira sariketaren helburuak.

Kategoriak:

– Dibulgazio-artikulu originalak. Bi azpikategoriatan banatuta dago: dibulgazio-artikulu orokorrak eta egilearen doktore-tesian oinarritutako dibulgazio-artikuluak. Azpikategoria bakoitzaren irabazleak 2.000 euroko saria eta Imanol Andonegiren eskultura bat eskuratuko du.

– Zientzia-kazetaritzaren arloko lanak. 2.000 eurorekin eta eskulturarekin saritzen da.

– Zientzia Gizartean sorkuntza-beka. Zientziaren/teknologiaren eta gizartearen arteko elkarrekintza lantzen duen proiektuak onartzen dira kategoria honetan. Aukeratutako proiektuaren egileak hura gauzatzeko 5.000 euroko diru-laguntza jasotzen du, baita eskultura ere.

– Horrez gain, aurten ere NEIKER sari berezia emango zaio lehen sektoreari lotutako artikulu onenari; saria 2.000 eurokoa izango da eta beste sariekin bateragarria; alegia, lehen sektoreko lan onenak beste kategoria bateko onena ere baden kasuan bi sariak jasoko ditu.

Lanak emateko epea: 2019ko otsailaren 14a.

Informazio gehiago: www.elhuyar.eus.

2018 Mikro-Ipuin XII. Lehiaketa

Euskokultur Fundazioak Pamiela argitaletxearekin batera antolatua.
Nafarroa Garaiko eta Nafarroa Beherea, Lapurdi eta Zuberoako Lehen Hezkuntza eta Bigarren Hezkuntzako ikasleei zuzenduta dago.
Lanek ehun hitz gehienez izan behar dituzte.
Sei kategoriatan antolatuta dago lehiaketa: D ereduko Lehen Hezkuntza, A ereduko Lehen Hezkuntza, Iparraldeko Lehen Maila (eskolak), D ereduko Bigarren Hezkuntza, A ereduko Bigarren Hezkuntza eta Iparraldeko Bigarren Maila (kolegioak).
Lanak entregatzeko epea: 2018ko abenduaren 21a.
Aurten Aingeru Epaltza, Inma Errea, Jon Abril, Fertxu Izquierdo eta Itziar Diez de Ultzurrun adituek osatzen dute epaimahaia.
Sariak: Kategoria bakoitzeko irabazle bat izanen da eta Pamiela Argitaletxearen liburu sorta bana emanen zaio. Bestalde, epaimahaiak erabakiko du zein ikastetxetan eginen den ikasle, irakasle eta artista gonbidatuarekin ospatu ohi den sari banaketaren ekitaldia. Aurtengo edizioko gonbidatu berezia Sustrai Colina bertsolaria izanen da.

Informazio gehiago: www.euskokultur.eus.